Тоқаев тазы мен төбетті ұлттық бренд ретінде кеңінен насихаттау жөнінде тапсырма берді

Мемлекет басшысы халықаралық аренада лайықты бағасын алған қазақы тазыны ұлттық бренд, мәдениетіміздің ажырамас бөлшегі ретінде халықаралық деңгейде толық таныту ортақ міндет екенін атап өтті, деп хабарлайды Zakon.kz.

Бұл жөнінде Қасым-Жомарт Тоқаев World Dog Show 2025 дүниежүзілік көрмесінде айтты.

"Тазы тұқымын дамыту және бірегей қасиеттерін сақтау, жүйелі ғылыми-зерттеу жұмыстарын жүргізу, халықаралық көрмелерге тұрақты қатысу сияқты бағыттардан тұратын бұл іске Қазақстан кинологтар одағымен қатар мемлекеттік органдар да белсенді атсалысуға тиіс",- деп жазды мемлекет басшысының баспасөз хатшысы Руслан Желдібай.

Оның айтуынша, Президент Іс басқармасы, Экология және табиғи ресурстар, Ғылым және жоғары білім, Ауыл шаруашылығы, Сыртқы істер министрліктері және басқа да құзырлы органдар, сондай-ақ жергілікті әкімдіктер бірлескен жүйелі жоспар аясында тиісті ұйымдастыру шараларын қолға алуы керек.

Сондай-ақ, Тоқаев төбет тұқымын да ерекше қамқорлыққа алып, мемлекеттік органдардың қолдауымен дәл осы ауқымда жұмыс атқару міндетін жүктеді.

Аталған мәселе Президент Әкімшілігінің ұдайы бақылауында болады.

Бұған дейін елімізде қазақтың тазысы мен төбетінің өз мерекесі болатынын жазғанбыз.