Тоқаев «Адам құқықтары мен заң үстемдігі саласындағы іс-қимыл жоспары туралы» Жарлыққа қол қойды

2023 жылы 8 желтоқсанда Мемлекет басшысы Қасым-Жомарт Тоқаев "Адам құқықтары мен заң үстемдігі саласындағы іс-қимыл жоспары туралы" Жарлыққа қол қойды, деп хабарлайды Zakon.kz.

"Адам құқықтары мен заң үстемдігін қорғау жүйесін одан әрі дамыту мақсатында қаулы етемін:

1. Қоса беріліп отырған "Адам құқықтары мен заң үстемдігі саласындағы іс-қимыл жоспары" (бұдан әрі – Іс-қимыл жоспары) бекітілсін.
2. Қазақстан Республикасы Үкіметі:

• Іс-қимыл жоспарын іске асыру бойынша қажетті шараларды қабылдасын;
• жартыжылдық негізде 15 шілдеге және 5 қаңтарға дейін Қазақстан Республикасы Президентінің Әкімшілігіне Іс-қимыл жоспарының орындалу барысы туралы ақпарат ұсынсын", делінген Президент Жарлығында.
  

Жарлық қол қойылған күнінен бастап қолданысқа енгізіледі.

Жоспарда мына салаларға қатысты нақты тапсырмалар белгіленген:

• әйелдерге қатысты кемсітушілікті жою;
• ерлер мен әйелдердің тең құқықтары мен мүмкіндіктерін ілгерілету;
• бірлестік бостандығы құқығы;
• мүгедек адамдарға қатысты адам құқықтары;
• адамның қылмыстық сот төрелігі, азаптаулардың жазасы мен алдын алу және қатыгез қарым-қатынас саласындағы құқықтары;
• адам саудасы құрбандарының құқықтарын қамтамасыз ету;
• көшіп-қонушыларға, азаматтығы жоқ адамдарға және босқындарға қатысты адам құқықтары;
• БҰҰ органдарымен өзара іс-қимыл тетіктерін жетілдіру;
• еңбек етуге, еңбекті қорғауға және кәсіподақтың қызметіне құқық;
• кәсіпкерлік қызметтегі адам құқықтары.