Си Цзиньпин ШЫҰ жайлы: Жақтастар мен мүдделестерді өзіне бұрынғыдан да көбірек тартуда

2024 жылғы 4 шілдеде Астанада Тәуелсіздік сарайында "ШЫҰ плюс" саммитінде Қытай Халық Республикасының Төрағасы Си Цзиньпин қазақстандық төрағалық еткен жылы ШЫҰ жаңаша дамуға бет алғанын атап өтті, деп хабарлайды Zakon.kz.

Си Цзиньпин Қасым-Жомарт Тоқаевқа қонақжайлылығы мен жоғары ұйымдастыру деңгейі үшін алғыс білдірді. Сондай-ақ, ол Астана сынды әдемі қалада бас қосып жатқандарына қуанышты екенін атап өтті.

"Таулар мен мұхиттар пікірі ортақ адамдарды бөліп-жара алмайды. Бұл жолы саммит алғаш рет "ШЫҰ плюс" форматында өткізіліп отыр, ол көптен бергі достар мен жаңа серіктестердің қатысуымен кең ауқымды мәселелерді талқылауға арналған алаң ретінде қызмет етеді. Бұл жаңа дәуірде жақтастары мен ойы ортақ адамдарды көбірек тарта түсуші ШЫҰ-ның беделін айқындай түседі", - деп толықтырды ҚХР Төрағасы.

Оның пікірінше, қазіргі әлем жаһандық, дәуірлік, тарихи маңызы бар бұрын-соңды болмаған өзгерістерге ұшырауда.

"Әлемдік тәртіп тез өзгеруде, кезекті ғылыми-техникалық және өнеркәсіптік революция қанат жаюда. Адамзат жеті мильдік қадамдармен алға жылжып келе жатқан уақытта тұрақсыздық пен дүдамалдылық факторы айтарлықтай артады. Түбегейлі өзгерістер жағдайында дана, тапқыр әрі шешім қабылдаушылық қабілетке ие болу өте маңызды. Біздің үйде бірлік пен сенім атмосферасын құру маңызды", - деді Си Цзиньпин.

ҚХР Төрағасы бұл - біздің ортақ құндылықтарымыз, оларды ұқыпты сақтап, дамытып отыру қажет деп сөзін толықтырды.

"Өз бетінше таңдаған даму жолын өзара құрметтеп, стратегиялық диалог арқылы байырғы мүдделерді қорғауда бір-бірімізді қолдап, келіспеушіліктерді жою, ұстанымдарды жақындастыру және өзара сенімді нығайту қажет", - деді ҚХР көшбасшысы.

Сондай-ақ ол кеңістікті бейбіт және қауіпсіз ету маңызды екенін атап өтті.

"Онсыз елдердің дамуы мен халықтардың бақыты туралы айта алмаймыз. Халықаралық жағдай қаншалықты өзгерсе де, ШЫҰ жалпы кешенді, бірлескен және тұрақты қауіпсіздіктің кепілі болып қала беруі тиіс. Қауіп-қатерлерге қарсы іс-қимыл жөніндегі әмбебап орталық пен оның бөлімшелерінің қабырғасын нығайтуды жеделдету, сондай-ақ есірткіге қарсы орталық құру қажет. Барлау ақпаратымен алмасуды арттыру және бірлескен операциялар жүргізу керек. Өңірлік қауіпсіздікті бірлесіп қолдау қажет", - деп сөзін жалғастырды Си Цзиньпин.

2024 жылғы 4 шілдеде Шанхай ынтымақтастық ұйымына (ШЫҰ) мүше мемлекеттер басшылары кеңесінің отырысы өтті.