Шымкентте әйелдер мерекесінде алаяқтық жасаған күдіктілер анықталды

Киберполицейлер қаланың жүздеген нәзік жанды тұрғынын әйелдер мерекесінде сыйлықсыз қалдырған алаяқтық схеманы ашты.

8 наурызға бірнеше күн қалғанда қаскөйлер әлеуметтік желіде шоколадтағы құлпынай сататын жалған онлайн-дүкен парақшасын ашқан.

Сенімді көрінген сайт жақындарын қуантқысы келген тұрғындардың назарын аударған.

Жәбірленушілер анасына, әжесіне, жұбайы немесе әпкесіне арналған сыйлыққа тапсырыс беріп, ақшасын төлегеннен кейін уәде етілген тәттілерді ала алмаған.

Жедел іс-шаралар барысында құқық қорғаушылар күдіктілерді анықтап, ұстады.

Қылмыстық жолмен ақша табуды ұйғарғандар екі жас жігіт болып шықты. Олар қамауға алынды. Қазіргі таңда полицейлер істің барлық мән-жайын анықтап жатыр.

Полиция алаяқтықтың құрбаны болмас үшін интернетте онлайн сатып алу кезінде аса мұқият болуға кеңес береді.