Өзгенің телефонын пайдаланып, 300 мың теңге айыппұлын төлеп алған оралдықтың қылмысы әшкере болды

Орал қаласының 25 жастағы тұрғыны өз айыппұлдарын төлеу үшін заңсыз әрекетке барған. Қылмыс Жаңа жылды қарсы алу кезінде орын алған, деп хабарлайды Zakon.kz.

ҚР ІІМ баспасөз қызметінің хабарлауынша, Шаған полиция бөлімі бұл оқиғаға қатысты ұялы телефон арқылы ақша ұрлау фактісі бойынша қылмыстық іс қозғады. Тергеу мәліметтеріне сәйкес, күдікті жәбірленуші ұйықтап жатқанда, оның телефонын ашу үшін саусақ ізін пайдаланған. Осылайша, ол танысының құрылғысын рұқсатсыз қолданып, өз айыппұлдарын төлеу үшін 300 мың теңге көлемінде қаражат аударған.

"Қазіргі таңда аталған дерек бойынша тергеу амалдары жүргізілуде. Бұл оқиға жеке деректер мен құрылғыларды қорғаудың маңыздылығын тағы бір мәрте дәлелдейді. Ұялы телефондарды және басқа да жеке гаджеттерді пайдалануда сақтық танытып, оларды бөгде адамдардың қолынан қорғау қажеттігі ерекше маңызды. Полиция қызметкерлері азаматтарды мұқият болуға шақыра отырып, ұялы телефон арқылы жасалған кез келген заңсыз әрекет қылмыс екенін және оның қатаң жауапкершілікке тартылатынын ескертеді", делінген полиция хабарламасында.

Құқық қорғау органдары осындай құқық бұзушылықтарды болдырмау үшін азаматтардың жеке деректеріне мұқият болуын сұрайды.

Бұған дейін Қостанайда қарақшылық шабуыл жасап, тонап, күштеп несие рәсімдеткен жапа шеккен дәрігердің ерегескен танысы болып шыққанын жазған болатынбыз.