Қостанайда кәсіпкер өзінің жиһаз цехында ірі көлемде гашиш пен марихуана сақтаған

Қостанай облысы ПД Есірткі қылмысына қарсы іс-қимыл бөлімінің қызметкерлері жедел іздестіру іс-шаралары барысында қызметтік итті пайдалана отырып, жиһаз цехында жасыл түсті заттарды сақтаған 38 жастағы ер адамды анықтап, ұстады, деп хабарлайды Zakon.kz.

Полиция мәліметінше, күдікті жеке кәсіпкер бола отырып, тапсырыс бойынша жиһаз өндірумен айналысқан. Сараптама көрсеткендей, тәркіленген заттар 600 грамм гашиш және 500 грамм марихуана болып шықты.

"Айта кету керек, бұл өте ірі көлемге жатады. Бұл факт бойынша полиция сотқа дейінгі тергеу жүргізіп жатыр. Есірткінің аса ірі партиясын өткізу мақсатында заңсыз сақтағаны үшін күдіктінің мүлкі тәркіленіп, ол 10 жылдан 15 жылға дейін бас бостандығынан айырылуы мүмкін", делінген полиция хабарламасында.

Бұған дейін Шымкентте есірткі өткізумен айналысқан екі студент ұсталғанын жазғанбыз.