Қазақстан Үкіметі Швейцариямен қылмыстық істер бойынша өзара құқықтық көмек туралы меморандумды мақұлдады

Қазақстан Үкіметінің 2024 жылғы 17 қыркүйектегі Швейцария Федералдық кеңесімен қылмыстық істер бойынша өзара құқықтық көмек жайында меморандумға қол қою туралы қаулысы қабылданды, деп хабарлайды Zakon.kz.

Үкімет атынан құжатқа ҚР Бас прокуроры Берік Асылов қол қоюға өкілетті.

Меморандумда қол қоюшы тараптар қылмыстық істер бойынша өзара құқықтық көмек саласындағы ынтымақтастықты жақсартуға ниетті екендігі айтылған.

Меморандум мыналарға бағытталған:

• қылмыстық істер бойынша өзара құқықтық көмек саласындағы ынтымақтастық үшін екі мемлекет арасындағы қалыптасқан және болашақтағы қатынастар үшін берік іргетасты дамыту;
• қылмыстық істер бойынша өзара құқықтық көмек көлемін анықтау;
• ынтымақтастықты дамыту жөніндегі шараларды тізбелеу;
• қол қоюшы тараптардың заңдарын, құқықтық жүйелерін және құқықтық институттарын тереңірек түсінуге жәрдемдесу;
• қылмыстық істер бойынша өзара құқықтық көмек көрсетуге тікелей жауапты қол қоюшы тараптардың органдары арасындағы байланыстарды кеңейту және нығайту;
• өзара құқықтық көмек көрсету процедурасының кейбір аспектілерін жеңілдету.

Өзара құқықтық көмек, келесі мақсаттар үшін жүзеге асырылуы мүмкін:

• құжаттарды тапсыру;
• дәлелдемелерді алу және беру;
• объектілерді немесе мүлікті тыйым салу, тәркілеу және беру.

Құқықтық көмек келесі шараларды қамтуы мүмкін:

• сот құжаттарын тапсыру;
• дәлелдемелерді жинау немесе адамдардың өтініштерін алу;
• тінту жүргізу, сондай-ақ активтерге тыйым салу;
• объектілер мен үй-жайларды тексеру;
• ақпаратты, құжаттарды, заттай дәлелдемелерді және сараптамалық қорытындыларды ұсыну;
• банктік, қаржылық, корпоративтік немесе коммерциялық құжаттарды қоса алғанда, тиісті құжаттар мен материалдардың түпнұсқаларын немесе көшірмелерін ұсыну;
• дәлелдеу мақсатында қылмыстардан, мүліктен, қаражаттан немесе басқа заттардан түсетін кірістерді анықтау немесе қадағалау;
• тәркілеу немесе өтеу мақсатында объектілерді немесе мүлікті заңды тұлғаға беру;
• алдын ала сұратусыз ақпаратты өз бетінше беру.

Қаулы қол қойылған күнінен бастап қолданысқа енгізіледі.