Қазақстан түрмелері жасақ-барак түріндегі ұстау жүйесінен ақырындап бас тартып жатыр

ҚР ІІМ ҚАЖК басшысы Жанат Ешмағамбетов Сенатта Қазақстандағы түзеу мекемелерінде камерамен қамту пайызы артатынын мәлімдеді, деп хабарлайды Zakon.kz.

Ешмағамбетов жалпы әлемдік стандарттарға жақындай түсу үшін жасақ-барак түріндегі ұстау жүйесінен камерада ұстау жүйесіне өту бойынша жұмыстар жүргізіліп жатқанын жеткізді.

"Қазір елімізде камералық ұстау жүйесі сипатында тоғыз мекеме бар, онда 4 мыңнан астам адам қамауда. Жол картасына сәйкес 6 түзеу мекемесіндегі 12 тұрғын блокты қайта жаңғырту бойынша іс-шаралар енгізілген. Ағымдағы жылдың өзінде өткен жылы әзірленген жобалау-сметалық құжаттама бойынша 8 тұрғын блокты қайта жаңарту жоспарланған. Нәтижесінде жыл соңына дейін камерамен қамту пайызы 28%- ға жетеді немесе 5,5 мың адам камералық ұстау жүйесіне сәйкес орналасады". ҚАЖК басшысы Жанат Ешмағамбетов

Сондай-ақ, оның айтуынша, әзірленіп жатқан қоғамдық қауіпсіздікті қамтамасыз ету тұжырымдамасы шеңберінде қоғаммен 2024-2028 жылдарға арналған серіктестікте мемлекеттік бюджет есебінен жаңадан құрылған облыстарда 4 заманауи тергеу изоляторларын салу, сондай-ақ МЖӘ тетігін іске асыру шеңберінде камералық ұстау жүйесіне сүйенетін 14 аралас қауіпсіздік мекемесі мен 5 тергеу изоляторларын салу көзделген.