Қазақстан мен Таиланд Сауда-экономикалық ынтымақтастықты дамытатын болады

ҚР Үкіметі 2024 жылғы 27 қарашадағы қаулысымен Қазақстан Республикасының Үкіметі мен Таиланд Корольдігінің Үкіметі арасындағы сауда-экономикалық ынтымақтастық туралы келісімді бекітті, деп хабарлайды Zakon.kz.

Келісім негіздемелік құжат болып табылады, сауда, инвестициялар, кәсіпкерлік, төлем балансын қорғау сияқты салалардағы ынтымақтастықтың негізін қалайды және қолданыстағы екіжақты сауда-экономикалық қатынастарды одан әрі дамыту және нығайту мақсатында жасалады.

Құжатта тауарлар мен қызметтердің импорты мен экспорты ұлттық заңнамаға сәйкес екі елдің жеке және заңды тұлғалары арасында жасалған коммерциялық келісімшарттар негізінде жүзеге асырылатындығы айтылған.

Сауда қатынастарын дамыту үшін екі елде де өткізілетін көрмелер, миссиялар, іскерлік кездесулер мен семинарлар сияқты сауда және жарнамалық іс-шараларға шаруашылық жүргізуші субъектілердің қатысуы ынталандырылады.

Бұдан басқа, тараптар кедендік баждарды, екінші Тараптың аумағына уақытша әкелінген тауарларға салынатын салықтарды төлеуден босатылуға, сатуға арналмағанына және кейіннен кері экспортқа жататынына уағдаласты.

Келісім шеңберінде өзінің тиісті билік органдарының өкілдерінен тұратын бірлескен Сауда комитеті құрылады.

Комитеттің функцияларына мыналар жатады:

• екіжақты сауда қатынастарына шолу;
• осы Келісімнің орындалуын мониторингілеу және қадағалау;
• елдер арасындағы екіжақты сауда, инвестициялық және экономикалық қатынастарды кеңейту және әртараптандыру мүмкіндігін зерттеу;
• сауда және инвестициялар саласында ақпарат алмасуға, сондай-ақ елдердің тиісті ведомстволары арасындағы ынтымақтастыққа жәрдемдесу.

Келісім бес жыл ішінде автоматты түрде ұзартумен жасалды.

Қаулы 2024 жылғы 27 қарашадан бастап қолданысқа енгізілді.