ІІМ жаңа оқу жылының басталуына қалай дайындалып жатыр

Қазақстан Республикасы Ішкі істер министрлігі жаңа оқу жылы қарсаңында балалардың қауіпсіздігін қамтамасыз ету шаралары күшейтілетінін мәлімдеді, деп хабарлайды Zakon.kz.

Бұл туралы ІІМ баспасөз қызметі мәлімдеді. Қазіргі уақытта Қазақстанда 7 656 жалпы білім беретін мектеп жұмыс істейді. Оларда 283 мыңнан астам бейнебақылау камерасы орнатылған. Оның ішінде 7 159 мектептің камералары жедел басқару орталықтарына немесе ішкі істер органдарының кезекші бөлімдеріне қосылған.

"Мұндай жүйе болып жатқан жағдайларды тіркеп қана қоймай, туындаған қауіп-қатерлерге жедел әрекет етуге мүмкіндік береді. Сонымен қатар бейнебақылау – қауіпсіздікті қамтамасыз етудің кешенді жүйесінің бір ғана элементі", – делінген хабарламада.

Балалардың мектепке барар жолындағы қауіпсіздігіне де ерекше көңіл бөлінуде. Жаңа оқу жылына дайындық барысында ІІМ білім беру нысандарының маңындағы жол инфрақұрылымына 9 417 тексеру жүргізді. Нәтижесінде анықталған кемшіліктерді жою бойынша 4 070 нұсқама берілді. Бүгінде олардың орындалғаны туралы 3 440 жауап алынған.

Білім беру ұйымдарының маңында:

• 258 жаяу жүргіншілер өткелі орнатылып, жабдықталды;
• 1 429 жасанды жол кедір-бұдыры жасалды;
• 4 854 жол белгісі орнатылды;
• 10 шақырымнан астам қоршау қойылды;
• 1 897 жарықтандыру нысаны орнатылды.

Балалардың қауіпсіздігін тек полиция күштерімен қамтамасыз ету мүмкін емес. Бұл ретте ата-аналардың, педагогтердің, мемлекеттік органдардың және бүкіл қоғамның бірлескен жұмысы маңызды.

"Бүгінде бұл жұмыс баланың алаңсыз білім алып, дамуына және өз болашағын құруына жағдай жасауға бағытталған ортақ мемлекеттік міндетке біріктірілді", – деп атап өтті құқық қорғау органдары.

Сонымен қатар мектептердің жаңа оқу жылына дайындығы туралы ҚР Денсаулық сақтау министрлігі Санитариялық-эпидемиологиялық бақылау комитетінің төрағасы Сархат Бейсенова да айтып берді.