ІІМ Telegram арнасындағы жаңа алаяқтық тәсілі туралы ескертті

Қазақстан Ішкі істер министрлігі (ІІМ) 2026 жылғы 13 шілдеде ел тұрғындарына жаңа алаяқтық тәсілі туралы маңызды ескерту жасады, деп хабарлайды Zakon.kz.

Ведомствоның жаңартылған мәліметінше, алаяқтар Telegram мессенджері арқылы азаматтарға хабарласып, өздерін мемлекеттік органдардың, компаниялар мен ұйымдардың басшылары ретінде таныстырады.

Сенімді көріну үшін олар нақты басшылардың фотосуреттерін, аты-жөнін және басқа да деректерін пайдаланады.

ІІМ мәліметінше, қаскөйлер директордың, басшының немесе өзге де лауазымды тұлғаның атынан қызметкерлерге шұғыл түрде өздері көрсеткен шотқа ақша аударуды, белгілі бір қызметтің ақысын төлеуді, тауар үшін қаражат жіберуді немесе басқа да қаржылық операцияларды орындауды талап ететін хабарламалар жолдайды.

Ведомство мұндай хабарламаларды көбіне бухгалтерлер, қаржы қызметкерлері және ұйымның қаражатына қол жеткізе алатын басқа да тұлғалар алуы мүмкін екенін атап өтті.

Осыған байланысты ІІМ қазақстандықтарға мынадай кеңес береді:

• ақша аудармаңыз және ешқандай қаржылық операция жасамаңыз;
• міндетті түрде басшыңызбен телефон арқылы немесе жеке байланысып, ақпаратты нақтылаңыз;
• жіберушінің телефон нөмірін, аккаунтын және хабарламаның мазмұнын мұқият тексеріңіз;
• қандай да бір күмән туындаса, хат алмасуды бірден тоқтатып, болған жағдай туралы басшылыққа және жауапты қызметкерлерге хабарлаңыз.

"Қырағылық таныту қаржыңызды сақтап, алаяқтықтың алдын алуға көмектеседі", – деп мәлімдеді Қазақстан ІІМ-нің баспасөз қызметі.

Еске салайық, бұған дейін Қазақстанда 87 жастағы қарияның өзін eGov қызметкері ретінде таныстырған алаяқтың құрбаны болғаны хабарланған еді.