Химия олимпиадасында қазақстандықтар АҚШ, Жапония және Қытайды басып озды

Бразилияда химиядан 59-шы Халықаралық Менделеев олимпиадасы аяқталды. Қазақстандық мектеп оқушылары 11 медаль жеңіп алып, АҚШ, Жапония, Қытай және Еуропа елдерін қоса алғанда, әлемнің ең мықты командаларын жеңіп, 40 қатысушы елдің арасында үздік нәтижелердің бірін көрсетті.

Осылайша, Білім министрлігінің хабарлауынша, команда құрамында 2024-2025 оқу жылының химия пәні бойынша республикалық олимпиадасының жеңімпаздары – 10-11 (12) сынып оқушылары болды.

Команданың барлық мүшелері халықаралық турнирде жүлдегер атанып, Қазақстандағы білім жүйесінің және дарынды оқушыларға көрсетілетін қолдаудың жоғары деңгейде екенін дәлелдеді.

"Байқауда Маңғыстау облысындағы "Білім-Инновация" лицейінің 10-сынып оқушысы Меңдіғали Қалдыбай практикалық кезеңде ең жоғары ұпай жинап, "Award for the Best Score in the Practical Exam" арнайы сыйлығына ие болды." Қазақстан Республикасының Оқу-ағарту министрлігі

Күміс жүлде иеленгендер:

Данияр Базарбай – 11 сынып оқушысы, "Білім-Инновация" лицейі, Ақтөбе облысы;

Меңдіғали Қалдыбай – 10 сынып оқушысы, "Білім-Инновация" лицейі, Маңғыстау облысы;

Аңсар Жақсылықов – 11 сынып оқушысы, "Білім-Инновация" лицейі, Ақтөбе облысы;

Арен Теңізбаев – 10 сынып оқушысы, №9 "Білім-Инновация" лицейі, Қызылорда облысы;

Санжар Қалиақбар – 11 сынып оқушысы, "Білім-Инновация" лицейі, Қарағанды облысы;

Қали Әбілмансұр – 10 сынып оқушысы, Назарбаева зияткерлік мектебі, Астана қаласы;

Райымбек Ғабдолла – 11 сынып оқушысы, "Білім-Инновация" лицейі, Маңғыстау облысы.

Сурет: Қазақстан Республикасының Оқу-ағарту министрлігі

Қола жүлде иеленгендер:

Айзере Жеңісханова – 10 сынып оқушысы, Назарбаев зияткерлік мектебі, Өскемен қаласы;

Нұрқожа Умарбаев – 11 сынып оқушысы, "Білім-Инновация" лицейі, Маңғыстау облысы;

Ярослава Кравчук – 11 сынып оқушысы, №8 дарынды балаларға арналған мектеп-лицейі, Павлодар қаласы;

Алихан Серікұлы – 11 сынып оқушысы, "Haileybury Almaty" мектебі, Алматы қаласы.

Команданың жетекшілері — Бахытжан Елдана және Азим Аманжолов.

Естеріңізге сала кетейік, Халықаралық Менделеев олимпиадасы Қазақстан ұлттық құрамасы үшін 2025 жылдың 5-14 шілде аралығында Біріккен Араб Әмірліктерінде өтетін химиядан Халықаралық олимпиадаға (IChO) дайындықтың маңызды кезеңі болып саналады.