Елордада әлеуметтік маңызы бар азық-түлік бағасына бақылау күшейді

Әлеуметтік маңызы бар өнімдер бағасының негізсіз өсуіне жол бермеу мақсатында Астанада азық-түлік тауарларының бағасына бақылау күшейтілді, деп хабарлайды Zakon.kz.

Әкімдік ақпаратына сүйенсек, мониторингтік топ құрамына сауда департаменті, әкімдік, мемлекеттік кірістер органдары және санитарлық-эпидемиологиялық қызмет өкілдері енген.

Азық-түлік бағасын қаладағы ірі сауда нысандарында комиссиямен бірге Астананың Инвестициялар және кәсіпкерлікті дамыту басқармасы басшысының орынбасары Мақсат Жанабаев тексерді.

Сурет: Астана әкімдігі

"Бүгін өңірлік комиссия мүшелерімен бірге қаланың ірі базарларын аралап шықтық. Негізгі міндет – әлеуметтік маңызы бар тауарлар бағасына мониторинг жүргізу және делдалдық схемаларды анықтау. Қазіргі таңда түсіндіру жұмысы жүргізіліп, ет өнімдеріне – сиыр, жылқы және қой етіне баға бақылауы қойылды", – деді Мақсат Жанабаев.

Мұндай тексерістер тұрақты түрде жүргізіліп, астаналықтар үшін азық-түлік қолжетімділігін қамтамасыз етуге бағытталған.

Бұған дейін мемлекеттік күзет қызметі Астана тұрғындарына маңызды ескерту жасағанын жазғанбыз.