Әлемде тұрақсыздық белең алған алмағайып кезде Қазақстанның халықаралық беделі биік тұр – Тоқаев

Президент Қасым-Жомарт Тоқаев әлемде жаңа тәртіп қалыптасып жатқанын айтты. Оның сөзінше, қазіргі кезең қарама-қайшылыққа толы және адамзат тарихындағы елеулі бетбұрыс болуы мүмкін.

Мемлекет басшысы мұндай жағдайда өз егемендігін экономика, ғылым, әскери және дипломатия салаларында нақты іспен қорғап, нығайта алатын, сондай-ақ адам әлеуетін дамытуға басымдық беретін мемлекеттер ғана жаңа дәуірге бейімделетінін атап өтті.

Тоқаевтың айтуынша, Қазақстан үшін реформаларды жалғастырудың баламасы жоқ.

"Қарапайым тілмен айтқанда, артқа шегінер жол жоқ. Бұл – елеулі жетістік", – деді ол.

Президент Қазақстанда жүргізіліп жатқан реформалардың күн тәртібінде қазіргі және болашақтағы ықтимал жаһандық сын-қатерлер ескерілгенін жеткізді.

"Басқаша айтқанда, сол сынақтарды еңсеру үшін алдын алу шаралары қабылданады", – деді Қасым-Жомарт Тоқаев.

Оның айтуынша, негізгі мақсат – туындауы мүмкін сынақтарға алдын ала дайындалып, оларды еңсеруге қажетті шараларды уақытылы қабылдау.