Дональд Трамп Қасым-Жомарт Тоқаевты және Қазақстанды Бейбітшілік Кеңесіне шақырды

АҚШ президенті Дональд Трамп Қазақстан президенті Қасым-Жомарт Тоқаевты және Қазақстанды Бейбітшілік Кеңесіне шақырды. Бұл туралы ҚР президентінің көмекшісі – баспасөз хатшысы Руслан Желдібай мәлімдеді, деп хабарлайды Zakon.kz.

Руслан Желдібайдың айтуынша, "бірқатар ел басшыларының мәлімдемелерінен кейін Дональд Трамптың ресми шақыруын алған фактісін жасыру дұрыс болмас еді".

"Иә, Қасым-Жомарт Тоқаев әлемдік басшылардың арасында ең бірінші болып ресми түрде Бейбітшілік Кеңесінің құрамына шақырылды, ал Қазақстан осы жаңа бірлестіктің негізін қалаушы мемлекеттердің бірі болуға ұсынылды. Жауап ретінде мемлекет басшысы АҚШ Президентіне шынайы алғысын білдіретін және бұл жаңа бірлестіктің құрамына кіруге келісімін растайтын хат жолдады", – деп хабарлады президенттің көмекшісі.

Сонымен қатар, Руслан Желдібайдың айтуынша, Қасым-Жомарт Тоқаев Қазақстанның Таяу Шығыста тұрақты бейбітшілікті орнатуға, мемлекетаралық сенімді нығайтуға және жаһандық тұрақтылыққа өз үлесін қосуға дайын екенін растаған.

Естеріңізге сала кетейік, 2025 жылғы 23 желтоқсанда белгілі болғандай, ұзақ әңгімеден кейін Қасым-Жомарт Тоқаев Дональд Трампты Қазақстанға келуге шақырған.