Атырауда 250 әйел сүт безі обырының алдын алу бойынша тексеруден өтті

"Әділет" партиясы Атырау облыстық филиалы Әйелдер қанатының ұйымдастыруымен №7 емханада "Әйел өмірі үшін" республикалық айлығы аясында ашық есік күні өтті. Әйелдер онколог-маммолог пен акушер-гинекологтың кеңесін алып, тексеруден өтті, деп хабарлайды Zakon.kz.

Емхананың профилактикалық бөлімінің меңгерушісі Мәдина Ахметқазиеваның айтуынша, күніне шамамен 50 әйел маммографиядан өтеді. Ашық есік күні 250 тұрғын медициналық кеңес алды.

Сурет: "Әділет" партиясы

Атырау облысында сүт безі обыры диагнозымен есепте тұрған әйелдер саны 800-ден асады. Ауруды ерте анықтау үшін профилактикалық тексерулер мен скринингтен тұрақты өту қажет, – деді дәрігер.

Сурет: "Әділет" партиясы

Тұрғын Гүлжихан Қарабалина мұндай шаралардың әйелдер денсаулығын сақтаудағы маңызы зор екенін атап өтті.

Сурет: "Әділет" партиясы

Әйелдер қанатының жетекшісі Айгүл Әмірғалиеваның айтуынша, партия облыс емханаларында ашық есік күндерін, диагностикалық тексерулер мен ақпараттық кездесулер ұйымдастырып келеді.

Әйел денсаулығын қорғау – қоғамның ортақ міндеті. "Әйел өмірі үшін" республикалық айлығы аясында Индер ауданында, Атырау университетінде және №7 емханада бірқатар іс-шара өткізілді. Басты мақсатымыз – әйелдердің өз денсаулығына уақытылы көңіл бөлуіне ықпал ету, – деді Айгүл Әмірғалиева.

Сурет: "Әділет" партиясы