Астананың суретшілеріне қала ғимараттарына мурал мен граффити салуға рұқсат беріледі

Елордада Алматы ауданының әкімдігі қызықты мурал мен граффити салғысы келетін суретшілер мен өнер сүйер қауымның ұсыныстарын қабылдап жатқанын мәлімдеді. Бұл бастама вандализмнің алдын алуға бағытталған, деп хабарлайды Zakon.kz.

Қала әкімдігінің мәліметінше, талантты азаматтардың креативті идеясы мен ұсыныстары ескерілетін болады.

"Қала тұрғындары мен қонақтарын қоғамдық кеңістікке құрмет көрсетуге және заң аясында әрекет етуге шақырамыз. Заңсыз граффити қылмыстық жауапкершілікке әкелетінін еске салады", делінген хабарламада.

Сндай-ақ қала билігі өтінімдерді қабылдау тұрақты негізде жүзеге асырылатыны, оларды іріктеу үшін арнайы комиссия құрылатынын нақтылайды.

"Эскизіңіз бекітілгеннен кейін авторға жобасын орындауға рұқсат беріледі және қабырға суреті немесе граффити орналасатын жер анықталады", делінген хабарламада.

Өтінімдерді қабылдау жөнінде сұрақтар бойынша Алматы ауданы әкімдігіне (Тәуелсіздік даңғылы, 7) немесе Instagram @almaty_audany парақшасы арқылы хабарласуға болады.

Бұған дейін елорда билігі қала тұрғындарына ескерту жасап, маңызды мәліметпен бөліскенін хабарлағанбыз. Қала әкімдігі бөтен адамдардың суына есірткі қосу жиілеп кеткенін, сондықтан дәріханада қолжетімді бағада бар арнайы жолақты өздерімен бірге алып жүруге кеңес береді.