Астанада электросамокаттың қатысуымен болған жол-көлік оқиғаларында 50 адам зардап шекті

Астананың полиция департаменті әкімшілік полиция басқармасының орынбасары Махамбет Төлешов 2026 жылғы 3 сәуірде өткен баспасөз мәслихатында электросамокаттың қатысуымен болған жол-көлік оқиғалары жайлы статистиканы жариялады, деп хабарлайды Zakon.kz тілшісі.

Оның айтуынша, елордада электросамокаттарды пайдалану айтарлықтай өскен. Қазіргі таңда олардың саны 10 мыңнан асады, оның ішінде белсенді пайдаланылып жүргені шамамен 8 мың.

"Сонымен қатар, құқық бұзушылықтар мен жол-көлік оқиғаларының саны да артып келеді. Жыл басынан бері барлығы 294 жол-көлік оқиғасы тіркелді, оның ішінде 4 адам қаза тауып, 373 адам жарақат алды. Электросамокат қатысқан 45 жол-көлік оқиғасында 50 адам зардап шекті, бірақ өлім жағдайлары тіркелген жоқ", – деді Төлешов.

Оның айтуынша, құқықтық тәжірибені талдау көрсеткендей, электросамокат пайдаланушылары тарапынан құқық бұзушылықтар жүйелі түрде қайталанып отыр.

Ең көп кездесетін бұзушылықтар:

• Бір самокатта екі адамның қатар жүруі;
• Жаяу жүргіншілер жолынан өтерде самокаттан түспеу;
• Электросамокаттарды кәмелетке толмағандардың пайдалануы.

Бұған дейін Алматыда самокат жүргізушілеріне бақылау күшейтілгенін жазғанбыз.