Астанада ат спортынан әлемдік деңгейде бірнеше жарыс өтеді

Астанада конкур бойынша Еуразиялық лига Кубогының кезеңі (FEI CSI1-W) және аттың жүріс мәнері, яғни дрессура бойынша халықаралық турнир (FEI CDI1) өтеді. Бұл – еліміздің спорт қауымдастығы мен ат спорты жанкүйерлері үшін маңызды оқиға болмақ, деп хабарлайды Zakon.kz.

Әлемдік деңгейдегі жарыстардың өткізілуі туралы толығырақ Астана қаласы Коммуникациялар қызметінде өткен брифинг барысында қалалық Дене шынықтыру және спорт басқармасы басшысының орынбасары Азамат Ағзамов айтып берді.

Астана қаласы әкімдігі баспасөз қызметінің хабарлауынша, 30 мамыр мен 1 маусым аралығында Астанадағы "Арғымақ" ат-спорттық-сауықтыру кешенінде Халықаралық ат спорты федерациясының (FEI) қолдауымен конкурдан Әлем кубогының кезеңі өтеді. Сонымен бірге халықаралық спорт күнтізбесіне енген CDI1 санатындағы дрессура турнирі де ұйымдастырылады.

Турнир аясындағы дрессура сайысы – шабандоз бен аттың үйлесімділігі, дәлдігі мен шеберлігі бағаланатын жоғары деңгейлі спорт түрі. Спорт пен өнердің тоғысқан көрінісі, көрермен үшін де ерекше әсерлі шоу болмақ.

Жыл соңына дейін Астанада мынадай ат спорты жарыстары өтеді:

• Шілде: Елорда кубогы құнан бәйге, аламан бәйге, жорға жарыс және ашық көкпар турнирі;
• Тамыз: Конституция күніне арналған республикалық бәйге;
• Қыркүйек: Маусым қорытындысына арналған көкпар сайысы;
• 25 қазан: Республика күніне арналған конкур жарысы;
• Желтоқсан: Тәуелсіздік күніне арналған қысқы конкур турнирі.

Аталған жарыстың барлығы ұлттық спортты дәріптеуге, мәдени мұрамызды сақтауға және қоғамда салауатты өмір салтын қалыптастыруға бағытталған.

Бұған дейін 2025 жылы 30 сәуірде ат спортынан Ташкентте өткен ірі қос турнирде отандық спортшылар сәтті өнер көрсеткені хабарланған.