Алматыда найзағай ойнап, қар аралас жаңбыр жауады: коммуналдық қызмет күшейтілген жұмыс режиміне көшірілді

Алматыда 5-6 сәуір аралығында жауын-шашын түседі деп болжанып отыр. Коммуналдық қызмет күшейтілген жұмыс режиміне көшірілді, деп хабарлайды Zakon.kz.

Алматы коммуналдық инфрақұрылымды дамыту басқармасының мәліметінше, 5 сәуір таңынан 6 сәуір түнге дейін 14 мм-ге дейін жауын-шашын, 15-20 м/с екпінді желмен бірге найзағай ойнайды. Таулы аймақта қар аралас жаңбыр жаууы ықтимал.

"Ықтимал су басудың алдын алу және салдарын жою мақсатында коммуналдық қызметтің, құтқару қызметі мен ТЖД-ның барлық техникасы әзір. 4 200 қап құм дайындалған. Су басуы мүмкін учаскеде түнгі уақыттан бастап ассенизатор машинасы мен мотопомпа жабдықталған бригадалар кезекшілік атқарады", - деп хабарлады ведомство.

Сонымен қатар жауын-шашын кезеңінде жергілікті су басудың алдын алу және оларды жою үшін мотопомпалар мен арнайы құралдармен жабдықталған жедел бригадалар жұмыс істейді.