Алматыда «Бақорда» сауда орталығы алдында жаяу жүргіншіні көлік қағып, мерт етті

6 қаңтарда Алматыдағы Рысқұлов даңғылында, "Бақорда" сауда орталығының қарама-қарсысында қайғылы оқиға орын алды, деп хабарлайды Zakon.kz.

Шығыс бағытта келе жатқан Nissan Cefiro көлігі кенеттен жолға атып шыққан ер адамды қағып кетті.

Жүргізушінің айтуынша, ол шамамен сағатына 50 км жылдамдықпен келе жатқан. Ер адамға соққы салдарынан ауыр ми жарақаты келтірілген. Зардап шеккен адам дәрігерлер келгенге дейін оқиға орнында жан тапсырды.

Марқұмның жеке басы анықталды, ол 1981 жылы туған ер адам. Жол полициясы қызметкерлерінің айтуынша, марқұм рұқсат етілмеген жерден жолды кескен, дегенмен апат орнынан небәрі 100 метр қашықтықта жаяу жүргіншілер өткелі болған.

Оқиға орнында криминалистер мен жол полициясының қызметкерлері болды. Оқиғаның барлық мән-жайлары кейінірек белгілі болады.

Бұл - кешегі кеште орын алған Алматыдағы ірі екінші жол апаты. Бұған дейін "Медеуге" барар жолда екі жеңіл бетпе-бет соқтығысып, бес адамның зардап шеккені хабарланған.