Алматы облысының полицейлері түсті металдың ірі партиясын ұрлағандарды ұстады

Оқиға 2024 жылдың қыркүйегінде Іле ауданындағы Жетыген станциясында болған. Майқұдық – Жетыген бағытымен келе жатқан жүк контейнерінен қаскөйлер жалпы құны 2 миллион теңгеден асатын 23 мыс табақты ұрлап кеткен, деп хабарлайды Zakon.kz.

Көлік полициясы бөлімінің қызметкерлері Қонаев станциясында қылмыстық топтың бес мүшесін ұстады. Олардың барлығы — бұрын сотталған Алматы және Жетісу облыстарының тұрғындары болып шыққан.

"Арнайы операция барысында СОБР арнайы жасағының қолдауымен үш күдікті Алматыда бір мезетте ұсталды. Біраз уақыттан кейін тергеуден бой тасаламақ болған тағы екі сыбайласы да қолға түсті", - деп хабарлады Алматы облыстық полиция департаменті.

Аталған іс бойынша ірі көлемде, алдын ала сөз байласқан топпен жасалған ұрлық бабымен сотқа дейінгі тергеу жүргізілді.

Сот барлық айыпталушыларды кінәлі деп танып, оларға бас бостандығынан айыру және шектеу түріндегі жазалар тағайындады.