Алматы облысында тас жолды еріген қар суы шайып кетті

Алматы облысында республикалық маңызы бар "Кеген – Нарынқол" автожолының бір бөлігін еріген қар суы шайып кетті, деп хабарлайды Zakon.kz.

Оқиға жолдың 20-шақырымында болған.

Алматы облысы әкімдігінің мәліметінше, еріген қар суының қатты ағыны салдарынан су өткізгіш құбырдың 4–5 бөлігі бұзылған. Соның нәтижесінде құбыр бітеліп, су жиналып қалған да, жолдың топырақ үйіндісі толық енінде шайылған.

"Айта кету керек, бұл жол 1960–1970 жылдары салынған және 50 жылдан астам уақыт пайдаланылып келеді. Осы уақытқа дейін мұндай шайылу жағдайлары және еріген судың айтарлықтай көбеюі тіркелмеген, сондықтан бұл учаске су тасқыны қаупі бар аймаққа жатқызылмаған", – деп хабарлады әкімдік.

Қазіргі уақытта аталған учаскеде қозғалыс жабылып, айналма жол ұйымдастырылған.

"Еріген қар суының негізгі ағыны басылғаннан кейін су өткізгіш құбыр мен жол төсемін қалпына келтіру жұмыстары басталады. Сондай-ақ бұл учаске орташа жөндеу жүргізу үшін мердігер ұйымға берілген. Жөндеу барысында зақымданған бөліктер қалпына келтіріліп, жол инфрақұрылымының табиғи әсерлерге төзімділігін арттыру шаралары қарастырылған", – деп қосты әкімдік.

Айта кетейік, бұған дейін Қостанай облысында су тасқынына байланысты Ресеймен шекарадағы өткізу пункті уақытша жабылған болатын.