Ақмолалық тұрғынды SMS-код миллиондаған қарызға батырды

Ақмола облысы Есіл ауданының тұрғыны қулықтың құрбаны болды. 9 сәуір күні ол аудандық полиция бөліміне арыз түсіріп, интернет-дүкеннен сатып алған затынан кейін белгісіз біреулердің арбауына түсіп қалғанын айтты, деп хабарлайды Zakon.kz.

Жәбірленушінің айтуынша, тапсырысты рәсімдеген соң көп ұзамай оған өзін курьер ретінде таныстырған әйел қоңырау шалып, тауарды жеткізу үшін СМС арқылы келген төрт таңбалы кодты айтып жіберуді сұраған. Артынша тағы бір адам хабарласып, өзін бірыңғай байланыс орталығының маманы ретінде таныстырып, жәбірленушінің жеке деректерінің бұзылғанын айтып, оны "киберқылмыспен күрес бөліміне", одан әрі "Қаржы министрлігінің өкіліне" ауыстырған.

Күдікті әрекеттерден соң жәбірленуші бірнеше банкке хабарласып, өзінің атына берілген өтінімдерді тексерткен. Көптеген қаржы ұйымдары күмәнді операцияларға тосқауыл қойғанымен, бір банктен несие рәсімделіп үлгергені анықталған. Ақыры ол алаяқтардың құрбаны болғанын түсініп, полицияға жүгінді.

Аталған факті бойынша қазіргі уақытта сотқа дейінгі тергеп-тексеру амалдары басталып, қылмыскерлерді анықтау үшін жедел-іздестіру шаралары жүргізіліп жатыр.

Полиция азаматтарға мынадай ескертулерді ұсынады:

• Ешқашан СМС-кодтарды, банктік карта деректерін, құпия сөздер мен PIN-кодтарды бөгде адамдарға айтпаңыз;
• Онлайн операцияларға шектеу қойыңыз, SMS-хабарламаларды қосыңыз;
• Ешкімге сеніп, қорқынышқа бой алдырмаңыз
• шұғыл жағдай туындаған кезде әңгімені доғарып, өз банкіңізге ресми нөмір арқылы қайта хабарласыңыз.