Ұлыбритания пандемияға қарсы күресте оң нәтижеге қол жеткізе алмады

Ұлыбритания COVID-19 пандемиясына қарсы күресте дәрменсіздік танытты. Тіпті, дамыған елдермен салыстырғанда ең нашар нәтиже көрсеткен. Әлемді әбігерге салған індеттің 5 жылдығынан кейін жүргізілген зерттеудің қорытындысы осындай.

Ұлыбританияда пандемия құрбандарын еске алуға арналған жүздеген шара өтті. Лондон халқы Биг Бен жанынан жүріп өтіп, Темза өзеніне қызыл қалампырлар тастады.

"Ауруханадағы кей науқастар жақында қайтыс болатынын білсе, кейбірі білмеді. Көпшілігіміз алғашқы екі-үш жыл бойы көз жасымызды тоқтата алмадық." Фелиция Кваку, Ұлыбританияның пандемия құрбандарын есте сақтау жөніндегі комиссияның мүшесі

Пандемиямен күресте экономикалық қолдауға қомақты қаражат жұмсалғанына қарамастан нәтиже мардымсыз. Халықтың өмір сүру ұзақтығы күрт төмендеп, денсаулығына байланысты жұмыс істей алмайтындардың саны артқан. Үйсіздер көбейіп, жастардың психикалық жағдайы әлсіреген, деп жазады qazaqstan.tv.

"Біз он жыл бұрынғы деңгейге оралдық. Ал басқа Батыс Еуропа елдері алға жылжып кетті. Бұл өте күрделі мәселе." Сива Анандачива, King’s Fund сараптамалық орталығының саясат жөніндегі директоры

Карантин аяқталғаннан кейін АҚШ-тан басқа "Үлкен жетілікке" мүше елдердің барлығында жұмысқа қайта қосылған ересектер саны артқан. Бірақ Британияда жағдай басқаша.

"Пандемия басталғалы бері тағы 1 миллион адам мүгедектік бойынша, ал 700 000 адам еңбекке жарамсыздық бойынша жәрдемақы алып отыр." Пол Джонсон, қаржы зерттеулер институтының директоры

Ұлыбритания құрбандар саны бойынша әлемде алтыншы орында тұр – 200 000-нан астам адам ковидтен көз жұмған. Бірақ кейбір ғылыми деректерге сәйкес, қайтыс болғандардың саны шын мәнінде бұдан әлдеқайда көп.