Сирияда көтерілісшілер Хама қаласын басып алды

Сирияда көтерілісшілер Хама қаласына кірді. Үкімет әскері оппозиция күштерімен қақтығыстан соң кейінге шегінген. Өткен аптада олар Алеппо қаласын уысынан шығарып алды.

Хама Сирияда 2011 жылы азаматтық соғыс басталғаннан бері үкімет күштерінің бақылауында болған еді. Көтерілісшілер қаладағы түрмеден жүздеген жақтасын бостандыққа шығарып жіберген.

"Әл-Жазира" телеарнасы көтерілісшілердің бейбіт тұрғындармен кездесіп, Хама көшелерінде әскери көлік мініп жүргенін көрсетті, деп жазады qazaqstan.tv.

Сирия армиясы бастапқыда қаланы көтерілісшілер бақылауға алғанын жоққа шығарғанымен, кейін мұны растады.

Екі қаланы басып алған оппозиция күштері оңтүстік бағытта Дамаскіге қарай жылжып барады. Сирияда кең ауқымды азаматтық соғыс отының қайта тұтануы Таяу шығыс өңірін одан әрі тұрақсыздандыра түсуі мүмкін.

"Сириядағы жағдайға қатысты Түркия президенті Режеп Тайып Ердоғанмен сөйлестім. Азаматтардың барлығына шұғыл гуманитарлық көмек қажет екенін баса айттым. Қантөгісті аяқтау үшін БҰҰ қолдайтын саяси процеске қайта оралу қажет. Тараптар халықаралық заңға сай бейбіт тұрғындарды қорғауға міндетті. Салмақты диалог жүргізетін уақыт келді." Антониу Гутерриш, БҰҰ Бас хатшысы