БҚО-да биыл бірнеше мәдени нысан бой көтерді

Батыс Қазақстан облысында мәдениет саласының алар орны ерекше. Биыл батыс өңірінде бірқатар мәдени нысан бой көтерді. Облыстық маңызы бар орталықтар күрделі жөндеуден өтіп, бүгінде халыққа қызмет етуде, деп хабарлайды Zakon.kz.

БҚО мәдениет басқармасы, баспасөз қызметінің берген мәліметіне сүйенсек, өңірдегі мәдени мекемелер қатары ұлттық құндылықтар мен төл тарихымызды дәріптейтін музей, орталықтармен толыққан.

Мәселен, Жаңақала ауданында Қырықопа ауылдық мәдениет үйі, Казталов ауданында Қайыңды ауылдық клубы,Тасқала ауданында Мерей ауылдық мәдени-спорт кешені, Сырым ауданында Тоғанас ауылдық мәдениет-спорт кешені халық игілігіне пайдалануға берілді.

Сонымен қатар, Бәйтерек ауданында Щапово ауылдық клубының құрылысы аяқталды. Ал Макаров және Көшім ауылдық клубының, Сырым аудандық орталықтандырылған кітапханасының құрылысы енді басталды.

Сурет: БҚО әкімдігінің баспасөз қызметі

Мәдениет саласындағы биылғы жылдың жаңалықтарының бірі – мекемелерді оңтайландыру және бюджет қаражатын үнемдеу мақсатында Атамекен өнер ордасы мен Ғ.Құрманғалиев атындағы облыстық филармониясының ұжымдары біріктірілді.

Сондай-ақ ортағасырлық қала мәдениеті мен өркениеттің дамығанын дәлелдейтін, Алтын Орда кезеңімен мерзімделетін археологиялық ескерткіш – "Жайық қалашығы тарихи-мәдени музей-қорығы" құрылды. Бүгінгі таңда заң құрылымдарына тіркелу, ұжымды орналастыру жұмыстары жүргізілуде.

Сурет: БҚО әкімдігінің баспасөз қызметі

Этноауыл аумағында орналасатын шеберлер ауылында облыстан 10 қолөнер шеберлері қатысты. Қараша айында Астана қаласында ақын, "Отан", "Құрмет" ордендерінің иегері Ақұштап Бақтыгерееваның 80 жас мерейтойына арналған ҚР Ұлттық академиялық кітапханасында және Л.Гумилев атындағы Еуразия Ұлттық университетінде кездесу кештері өткізіліп, Қ.Қуанышбаев атындағы қазақ ұлттық музыкалық театрында қойылымы сахналанды.

Ақжайық өлкесінен шыққан мәдениет саласында еңбегі елеулі тұлғалардың шығармашылығына арналған мәдени іс-шаралар ұйымдастырылып, республика деңгейінде өткізіліп келеді. Атап айтар болсақ, биыл ақын Ақұштап Бақтыгерееваның шығармашылығына арналған "Ақұлпа" республикалық музыка-поэтикалық байқауы өтті. Сондай-ақ, облыстық театрлардың гастрольдік сапарлары, аудандарда әр жанр бойынша республикалық және халықаралық байқаулар, айтыс ұйымдастырылды.

Сурет: БҚО әкімдігінің баспасөз қызметі

Сондай-ақ Казталов, Теректі, Бәйтерек, Бөкейорда, Жәнібек, Қаратөбе аудандарында 6 мәдени-спорттық кешендерінің және Сырым, Ақжайық, Жәнібек, Бәйтерек және Бөкейордасы аудандарында 5 архив ғимаратының құрылысын салу да келер жылдың еншісінде.