Жақында WhatsApp қолданушыларына тиімді функция ұсынылады

Танымал WhatsApp мессенджері қолданушылар көптен бері сұрап жүрген жаңа пайдалы мүмкіндікті сынақтан өткізіп жатыр. Бұл жаңарту негізгі чаттар тізімін қажетсіз хабарламалар мен қызметтік ескертулерден тазартуға көмектеседі, деп хабарлайды Zakon.kz.

Бұл туралы GSMArena басылымы жазды.

Жаңа функция іске қосылғаннан кейін банктерден, әуе компанияларынан және басқа да ірі ұйымдардан келетін қызметтік хабарламалар негізгі чаттар тізімінде тұрмайды. Олар автоматты түрде арнайы жеке бумаға (папкаға) жіберіледі. Мұндай хабарламалардың қатарына банк хабарламалары, әуе компанияларының ескертулері, түрлі жеңілдіктер мен акциялар туралы ақпарат және интернет-дүкендердегі тапсырыстың жеткізілу мәртебесі туралы хабарламалар кіреді.

Қолданушылар бұл мүмкіндікті қаласа, баптаулар (параметрлер) арқылы толықтай өшіре алады. Алайда хабарламалардың қанша уақыттан кейін ауыстырылатынын өз қалауынша өзгерту мүмкіндігі әзірге қарастырылмаған.

Алдын ала мәлімет бойынша, болашақта WhatsApp бұл мүмкіндікті кеңейтіп, шағын бизнес өкілдерінен келетін хабарламаларды да автоматты түрде жеке бумаға көшіруді жоспарлап отыр.