X вирусы 2026 жылы жаңа пандемияға себеп болуы мүмкін

Вирусолог ғалымдардың болжамынша, төрт вирус – маймыл шешегі, қызамық, құс тұмауы және Оропуш безгегі әлі толық зерттелмеген X патогенінің пайда болуына әкеліп, 2026 жылы жаңа ауқымды пандемия туындатуы мүмкін, деп хабарлайды Zakon.kz.

Daily Star басылымының жазуынша, мұндай қауіп аталған ауруларға қарсы вакцинация деңгейінің күрт төмендеуі мен вирустардың төзімділігінің артуына байланысты туындауы ықтимал.

Ұлыбританиядағы Саутгемптон университетінің медицина факультетінде жаһандық денсаулық сақтау саласының ғылыми қызметкері Майкл Хед қазіргі таңда әлемнің әр түкпірінде жұқтыру жағдайларының күрт көбейіп жатқанын мәлімдеді.

"Маймыл шешегінің өршуі әлемнің көптеген елінде, соның ішінде Еуропада, мысалы, Испанияда жалғасып жатыр. Жаңа штаммдар пайда болуда. Бұрын өте сирек кездескен бұл вирус қазір бүкіл әлемге таралғаны барған сайын анық байқалуда", – деді Хед.

Сондай-ақ ол бір кездері толықтай тоқтады деп есептелген қызамық ауруы қайта оралуы мүмкін деп алаңдайды. Себебі қызылша, эпидемиялық паротит және қызамықтан қорғайтын MMR вакцинасының қолданылу деңгейі соңғы 15 жылдағы ең төменгі көрсеткішке жеткен.

Глазго университетінің молекулалық және жасушалық вирусология профессоры Эд Хатчинсонның айтуынша, құс тұмауы (H5N1) да мутацияға ұшырап жатыр. Енді бұл вирус құстардан сүтқоректілерге, мысалы, сиырларға жұғуы мүмкін, демек сүт арқылы таралу қаупі де бар.

Оропуш вирусы адамға маса шағуы арқылы беріледі. Әдетте ол шағудан кейін сегіз күн ішінде білініп, белгілері денге безгегі мен Зика вирусына ұқсас болады.

Ғалымдардың пікірінше, аталған әрбір ауру теориялық тұрғыда бұрын белгісіз X вирусының пайда болуына және соның салдарынан жаһандық пандемияның өршуіне әкелуі мүмкін.