Тоқаев белгілі жазушы Төлен Әбдікке жеделхат жолдады

ҚР Мемлекет басшысы Қасым-Жомарт Тоқаев 2025 жылы 20 қаңтарда белгілі жазушы Төлен Әбдікке жеделхат жолдады, деп хабарлайды Zakon.kz.

Мемлекет басшысы Қасым-Жомарт Тоқаев Қазақстанның халық жазушысы, драматург, қоғам қайраткері Төлен Әбдікке "Егемен Қазақстан" газетінде жарияланған сұхбатына орай жеделхат жолдады.

"Егемен Қазақстан" газетіне берген сұхбатыңызды мұқият оқып шықтым. Өзекті ой-толғамдарыңыз арқылы ұлт руханияты үшін құнды дүниелер айтылған. Төл әдебиетіміздің даму көкжиегіне қатысты сын-пікірлеріңіз бен жас буынға қарата айтқан ақыл-кеңестеріңіз орынды деп санаймын. Шын мәнінде, жаһанды жайлаған қазіргідей құбылмалы заманда жазушылар қауымы көркем туындылары арқылы әділдік, жақсылық және адамдық құндылықтарын кеңінен дәріптегені жөн. Бұл еліміздің келешегі үшін өте маңызды. Қаламыңыз қарымды болсын! Сізге мықты денсаулық, бақ-береке және толайым табыс тілеймін!", делінген жеделхатта.

Айта кетсек, 2025 жылы 3 қаңтарда Ana tili газетінде Президент Тоқаевтың "Мақсатым – экономиканы және егемендікті нығайту" тақырыбындағы сұқбаты жарияланды.