Орталық Азиядағы ең биік зәулім ғимарат қай жерде салынатыны белгілі болды
© Сурет: rmjm
Тәжікстанның Душанбе қаласында биіктігі 340 метр болатын зәулім ғимараттың құрылысы басталды. Жоба аяқталғаннан кейін ол Орталық Азиядағы ең биік ғимарат атануы тиіс, деп хабарлайды Zakon.kz.
Naked Science жазуынша, Тәжікстан президенті Эмомали Рахмон мен Душанбе мэрі, Тәжікстан Республикасы Жоғары жиналысы Ұлттық кеңесінің төрағасы Рустам Эмомали елордадағы Шохмансур ауданында бой көтеретін жаңа көпфункционалды сәулет кешенінің іргетасына алғашқы тас қалаған.
Құрылысты бес жыл ішінде аяқтау жоспарланып отыр.
Сурет: Тәжікстан Президентінің баспасөз қызметі
Кешен 29 гектар аумақты алып, 52 нысанды қамтиды. Оның ішінде бес биік мұнара болады. Жобаның негізгі нысаны – биіктігі 340 метр, 77 қабатты Dushanbe Tower.
Ол қазіргі таңда аймақтағы ең биік ғимарат саналатын Астанадағы Abu Dhabi Plaza-дан асып түседі. Оның биіктігі – 311 метр, ал қабат саны – 75. Осылайша, Dushanbe Tower одан 29 метр биік болады.