Оралдағы мектептердің біріне жарылғыш зат қойылғаны туралы хабарлама жалған болып шықты

2024 жылдың 20 қарашасында полицияға Оралдағы мектептердің бірінде жарылғыш зат қойылғаны туралы хабарлама келіп түсті, деп хабарлайды Zakon.kz.

"Мой город" басылымы WhatsApp-та "№13 мектеп маңында патрульдік полиция мен жедел жәрдем көліктері тұрғаны туралы ақпарат тарап жатыр" деп жазады. Ал ата-аналар чаттарына мектепте дабыл белгісі қосылса, оқушылар эвакуацияланатыны туралы хабарлама жіберілген.

БҚО полиция департаменті аталған ақпарақа қатысты түсініктеме берді.

"20 қарашада Оралдағы мектептердің біріне жарылғыш зат қойылғаны туралы хабар келіп түсті. Оқиға орнына барлық арнайы және шұғыл қызметтер жіберілді. Алғашқы әрекет ету күштері мектепті тексерді. Хабарлама жалған болып шықты. Қазіргі уақытта қаскөйлерді анықтау бойынша жедел-іздестіру шаралары жүргізілуде", деп түсіндірді ведомстводан.

Департамент терроризм актісі туралы көрінеу жалған хабарлама үшін 5 мың АЕК-ке дейінгі мөлшерде айыппұл, не болмаса сол мөлшерде түзеу жұмыстарына тарту, сондай-ақ бес жылға дейінгі мерзімге бас бостандығынан айыру жазасы қарастырылатынын еске салады.