Мұнай бағасы төмендеді: балалардың Ұлттық қордан алатын төлемдері қалай өзгермек

Қазақстан Ұлттық банкінің төрағасы Тимур Сүлейменов 2025 жылғы 11 сәуірде өткен брифингте "Ұлттық қор – балаларға" жобасы бойынша балалардың табысына теңгенің курсы қалай әсер ететінін айтып берді, деп хабарлайды Zakon.kz тілшісі.

Ол Ұлттық қор балаларға өз активтерін инвестициялық басқарудан алынған табыстың 50%-ын бөлетінін еске салды. Оның айтуынша, ақша доллармен есептеледі.

"Тек баланың жасы 18-ге толғанда ғана ол тиісті өтініш береді — өмір сүру жағдайын жақсарту, білім алу немесе медициналық қажеттіліктер үшін, тек сол кезде олар теңгеге аударылады. Себебі Ұлттық қорда барлық есеп айырысулар доллармен жүргізіледі, сондықтан оның курсының өзгеруі ешқандай әсер етпейді. "Ұлттық қор – балаларға" бағдарламасының есебі доллармен іске асады, сәйкесінше теңгенің курсының өзгеруі балалардың табысына еш әсер етпейді", — деді ол.

Сонымен қатар, ол Ұлттық қордың инвестициялық табысы туралы болжамдарын айтқан жоқ.

"Ұлттық қордың нақты инвестициялық табысы қандай болатынын болжау қиын, себебі, қайталап айтамын, нарықтар қазір құбылмалы, біздің қолымыздан ештеңе келмейді, жаһандық нарықтарға әсер ете алмаймыз. Біз бұл кезеңнің эскалациядан кейін қалыпқа келіп, нарықтар қайта өсетініне үміттенеміз", — деп қосты Ұлттық банк басшысы.

Бұған дейін Ұлттық Банктің базалық мөлшерлеме бойынша шешімді жариялағаны хабарланған болатын.