Қазақстандық Канадада салмағы 300 келіден асатын ақ бекіре ұстады

Қазақстандық Руслан Шаекин Канадада салмағы 300 келіден асатын ақ бекіре аулады. Мамандардың болжамынша, балықтың жасы шамамен 85-100 жыл, деп хабарлайды Zakon.kz.

Руслан Шаекин өзінің олжасын әлеуметтік желіде бөлісіп, бұл жетістікке командасымен бірге қол жеткізгенін айтты.

"Әлемдегі ең ірі ақ бекірені Канаданың Британдық Колумбия провинциясындағы Фрейзер өзенінен аулауға болады. Біз дәл осы жерге олжа үшін келдік. Бүгін арманымыз орындалды", – деді ол.

Посмотреть эту публикацию в Instagram

Публикация от Шаекин Руслан (@shayekin_ruslan)

Балықшы ұстаған ақ бекіренің негізгі сипаттамалары:

• ұзындығы – 305 см;
• құйрығына дейінгі жалпы ұзындығы – 327 см;
• денеcінің жуандығы – 115 см.

Руслан Шаекиннің айтуынша, бұл көрсеткіштерге сәйкес балықтың шамамен салмағы 300-350 келі. Ал жасы 85-100 жыл деп болжанған. Өйткені балықта чип болмаған, яғни бұған дейін ешқашан ауланбаған.

"Мұндай олжаға қол жеткізу – үлкен сәттілік. Бұл жерде бақ, маусым, қасыңдағы адамдар және ең бастысы – дұрыс ниет маңызды. Біздің гид бес жасынан бері балық аулайды. Өткен жылы ғана ол өзенге 185 күн шыққан. Соған қарамастан, өмірінде ұзындығы үш метрден асатын бұл – небәрі екінші балығы. Оның өзі де қатты қуанып тұр. Қасымда болған барлық жігіттерге рақмет. Мақсатыңа жетудің сезімі – сөзбен айтып жеткізгісіз", – деді Руслан Шаекин.