Қазақстанда «Семей» жаңа арнайы экономикалық аймағы құрылды

Үкімет 2026 жылғы 7 қарашада "Семей" арнайы экономикалық аймағын (АЭА) құру туралы қаулы қабылдады, деп хабарлайды Zakon.kz.

Жаңа АЭА Абай облысының Жаңасемей ауданы аумағында орналасқан. Жалпы ауданы – 600 гектар.

Арнайы экономикалық аймақ мынадай мақсаттарда құрылады:

• Инвестициялық жобаларды іске асыру үшін заманауи инфрақұрылымдық және институционалдық орта қалыптастыру арқылы Қазақстанның шығыс өңіріндегі индустриялық және инвестициялық дамудың жаңа орталығын құру;
• Заманауи, жоғары өнімді әрі бәсекеге қабілетті өндірістерді жедел дамыту, қызмет көрсету сапасын жаңа деңгейге көтеру, инвестиция тарту, экономика салалары мен өңірге жаңа технологияларды енгізу, сондай-ақ халықты жұмыспен қамтуды арттыру;
• Химия өнеркәсібі, металл емес минералдық өнімдер, резеңке және пластмасса бұйымдары өндірісін, сондай-ақ қосылған құны жоғары өзге де өнімдерді қоса алғанда, өңдеу өнеркәсібін дамыту;
• Агроөнеркәсіп кешенін дамыту, ауыл шаруашылығы өнімдерін терең өңдеуге жағдай жасау, жергілікті қамту үлесін арттыру және жаңа өндірістік тізбектер қалыптастыру;
• Өңірдің көлік-логистикалық әлеуетін дамыту және Абай облысының транзиттік артықшылықтарын тиімді пайдалануға мүмкіндік беретін көлік-логистикалық хаб құру;
• Тұрақты әрі өнімді жұмыспен қамтуды ұйымдастыру, жұмыссыздық деңгейін төмендету, әлеуметтік көмек көрсету жүйесінің тиімділігін арттыру және адами капиталды дамыту арқылы халықтың әл-ауқатын жақсарту.

АЭА аумағында арнайы құқықтық режим белгіленеді. Оның ішінде еркін кеден аймағының кедендік рәсімін қолдану мүмкіндігі қарастырылған.

АЭА қатысушыларына салық салу Қазақстан Республикасының салық заңнамасына сәйкес реттеледі.

Сондай-ақ қаулыда заңда көзделген негіздер бойынша АЭА-ны тарату тәртібі белгіленген.

АЭА құрылу мерзімінің аяқталуына байланысты таратылған жағдайда, Абай облысының әкімдігі:

• Белгіленген мерзім аяқталғанға дейін кемінде үш ай бұрын бұқаралық ақпарат құралдарында АЭА-ны тарату, оған байланысты өтініштер мен талаптарды қабылдау тәртібі мен мерзімдері туралы хабарландыру жариялайды;
• АЭА аумағында қызметін жүзеге асыратын заңды және жеке тұлғаларға сол аумақтағы тауарларды өзге кедендік рәсім бойынша қайта ресімдеу тәртібін түсіндіреді;
• АЭА таратылғаннан кейін бір ай ішінде оның қызметінің нәтижелері туралы Президент пен Үкіметке есеп береді.

Бұдан бөлек, арнайы экономикалық аймақтың шекара жоспары бекітілді.

Сурет: құжаттан түсірілген

2050 жылға қарай АЭА үшін мынадай нысаналы көрсеткіштер белгіленген:

• Жалпы инвестиция көлемі – 1 365 млрд теңге;
• Шетелдік инвестиция көлемі – 565 млрд теңге;
• Отандық инвестиция көлемі – 800 млрд теңге;
• АЭА аумағында өндірілетін тауарлар мен көрсетілетін қызметтердің (жұмыстардың) көлемі – 600 млрд теңге;
• Қатысушы компаниялар саны – 155;
• АЭА аумағында құрылатын жұмыс орындарының саны – 14 000;

АЭА аумағындағы жалпы өндіріс көлеміндегі қазақстандық қамту үлесі – 80%.

Қаулы 2026 жылғы 7 қарашадан бастап қолданысқа енгізілді.