Қазақстан билігі өмірлік қиын жағдайға тап болған отбасыларға қалай көмектеседі

ҚР Еңбек және халықты әлеуметтік қорғау министрлігі 2024 жылғы 17 қыркүйекте өмірлік қиын жағдайға тап болған отбасыларға мемлекет атаулы әлеуметтік көмек (АӘК) тағайындайтынын еске салды, деп хабарлайды Zakon.kz.

Ведомствоның ақпаратынша, АӘК-тің негізгі мақсаты – ақшалай төлем түрінде қолдауды жүзеге асыру және отбасының еңбекке қабілетті мүшелерін жұмыспен қамтуға жәрдемдесудің белсенді шараларына тарту арқылы отбасын қиын өмірлік жағдайдан шығару.

"2024 жылғы 1 қыркүйектегі жағдай бойынша 72,7 мың отбасындағы 385,6 мың адамға атаулы әлеуметтік көмек тағайындалды. Биыл осы мақсатқа бюджеттен 55,9 млрд теңге қарастырылған",- деп хабарлады министрлік.

АӘК мыналарды көздейді:

• табысы өңірлік ең төмен күнкөріс деңгейінің 70% — нан аспайтын азаматтарға тоқсан сайын әлеуметтік көмек тағайындау;
• табысы аз отбасылардағы 1 жас пен 6 жас аралығындағы әр балаға 1,5 АЕК (5 538 теңге) мөлшерінде ай сайынғы қосымша төлем беру. 2024 жылғы 1 қыркүйекте АӘК алушылар қатарынан мектеп жасына дейінгі 119,5 мың балаға 3,7 млрд теңге сомасына қосымша төлем тағайындалды;
• жұмысқа орналастыру, өз ісін ашуға ниетті отбасыларға гранттар беру, біліктілікті арттыру курстарына жіберу (қажет болған жағдайда) және басқалар арқылы жұмыспен қамтуға жәрдемдесу.

Бұған дейін Алатау қаласы бюджетіндегі шығындар көлемі ұлғайтылғаны хабарланды.