Қазақстан азаматтығын алуға үміткерлерден өтініштер қабылдау 10 тамыздан басталады

Қазақстан Республикасының азаматтығын алуға үміткерлер үшін тестілеуге өтініштерді қабылдау 10-20 тамыз аралығында өтеді, деп хабарлайды Zakon.kz.

Өтініш беру Ұлттық тестілеу орталығының app.testcenter.kz сайтында немесе UTO қосымшасы арқылы жүргізіледі.

Тестілеу үш бөлімнен тұрады:

• қазақ тілі бойынша тест (қазақ тілінде) – 30 тапсырма, шекті балл – 15;
• Қазақстан Республикасы Конституциясының негіздері бойынша тест (қазақ немесе орыс тілінде) – 40 тапсырма, шекті балл – 20;
• Қазақстан тарихы бойынша тест (қазақ немесе орыс тілінде) – 30 тапсырма, шекті балл – 15.

Тестілеу уақыты – 2 сағат 10 минут.

"Мүмкіндігі шектеулі (мүгедектігі бар) тұлғаларға тестілеу тапсыру үшін қосымша 30 минут беріледі. Тестілеуге қатысу құны - 14 693 тг. Толық ақпарат testcenter.kz сайтында "Азаматтық алуға үміткерлерге" бөлімінде қолжетімді". Ұлттық тестілеу орталығы

Бұған дейін отандық ЖОО-лар қанша қосымша өзіндік білім беру грантын ұсынғаны белгілі болған.