Ғылыми зерттеулерді жүзеге асыратын ғылыми қызметкерлерге қосымша ақы қарастыратын заң қабылданды

2024 жылы 1 шілдеде Мемлекет басшысы Қасым-Жомарт Тоқаев "Ғылым және технологиялық саясат туралы" Қазақстан Республикасының Заңына қол қойды, деп хабарлайды Zakon.kz.

Бұл туралы Ақорданың баспасөз қызметі хабарлайды.

Сондай-ақ Мемлекет басшысы "Қазақстан Республикасының кейбір заңнамалық актілеріне ғылым және технологиялық саясат, платформалық жұмыспен қамту және мемлекеттік бақылау мәселелері бойынша өзгерістер мен толықтырулар енгізу туралы" Қазақстан Республикасының Заңына қол қойды.

"Ғылым және технологиялық саясат туралы" Заң жобасында "қауымдастырылған профессор (доцент)" және "профессор" ғылыми атақтары үшін жоғары оқу орындарының профессор-оқытушылар құрамына және республикалық бюджеттен ғылыми зерттеулерді жүзеге асыратын ғылыми қызметкерлерге қосымша ақы белгілеу көзделген.

Сондай-ақ Заң жобасында жас ғалымдардың тұрғын үй сатып алу немесе тұрғын үй жағдайын жақсарту құқығы қарастырылған.

"Жыл сайын әлемнің жетекші ғылыми орталықтарында 500 отандық ғалым тағылымдамадан өтеді. 2023 жылы 809 ғалымға әлемнің жетекші орталықтарында ғылыми тағылымдамадан өтуге гранттар берілді. Бұл бағыттағы жұмыс жалғасып келеді. 2023-2025 жылдарға арналған ғылымның жалпы бюджеті алдыңғы 2020-2022 жылдардағы үш жылдық кезеңмен салыстырғанда 3,3 есеге өсіп, 643 млрд теңгені құрады. Ғылым және жоғары білім министрлігінің конкурстарының нәтижесінде ғылыми зерттеулер жүргізуге арналған гранттық қаржыландыру бойынша 1981 жоба және бағдарламалық-нысаналы қаржыландыру шеңберінде 161 ғылыми-техникалық бағдарлама іске асырылып отыр", — деген бұған дейін ведомство басшысы Саясат Нұрбек Үкімет отырысында.