Футбол матчы кезінде ақтөбелік әйелдің бетіне доп тиіп, бас-ми жарақатын алды

Ақтөбеде өткен "Ақтөбе" мен "Алтай" футбол клубтарының матчы оқыс оқиғамен аяқталды. Ойын барысында трибунаға ұшып шыққан доп көрермендердің бірі - Ақтөбе қаласының тұрғыны Аянай Елтоқованың бетіне тиген, деп хабарлайды Zakon.kz.

"Astana TV" мәліметінше, соққы салдарынан әйел есінен танып, ми шайқалу және бас-ми жарақатын алған. Қазір ол ем қабылдап жатыр.

Жарақат алған әйел оқиғаны былай сипаттады:

"Қан кетті, мен басымды төмен түсірдім, кейін не болғанын білмеймін. Өз-өзіме стадион жанындағы орындықта отырған кезде әрең келдім. Ауруханаға барған кезде көмек көрсетті. Дәрігерлер ауруханаға жатқызу қажет екенін айтты. Соңында диагноз ретінде жабық бас-ми жарақаты, жұмсақ тіндердің соғылуы және ауыр дәрежедегі ми шайқалу қойылды", – деді ол.

Оның айтуынша, қазір бас ауруы мен ұйқысыздық мазалайды. Әйел бұл жағдай стадиондағы қауіпсіздік шараларының жеткіліксіздігінен болған деп есептейді. Сондай-ақ ол футбол клубының оқиғаға реакциясына көңілі толмағанын айтқан.

Клуб өкілінің айтуынша, олар әйелді және оның жұбайын кеңсеге шақырып, ресми түрде кешірім сұраған:

"Клуб тарихында мұндай жағдай алғаш рет болып отыр. Біз ресми түрде кешірім сұрадық, ертең кездесуге келістік. Сондай-ақ оған және жұбайына бір жылдық абонемент пен "Ақтөбе" клубының футболкаларын сыйға береміз. Әдетте қауіпсіздік торлары тек қақпа артында орнатылады, халықаралық стандарттар да солай", – деді клубтың медиаофицері Асет Жомарт.

Қазір зардап шеккен тарап клубтан моральдық және материалдық өтемақы талап ететінін мәлімдеді.

Бұған дейін қазақстандық боксшы Сербиядағы ірі турнирде жеңіске жетіп, топ жарғанын жазғанбыз.