Еуропадан келген алма шекарада заңсыз ұсталды

Бас көлік прокуратурасы Еуропадан әкелінген балғын алмаларды бірнеше күн бойы кедендік рәсімдей алмаған қазақстандық кәсіпкерлердің құқығын қалпына келтірді, деп хабарлайды Zakon.kz

Бұл туралы 8 қарашада Бас көлік прокуратурасы мәлімдеді.

"Кәсіпкерлер Ауыл шаруашылығы министрлігі енгізген шектеулерге байланысты уақытша сақтау қоймаларында жемістердің тонналап бос жатқанына шағымданды. Прокуратураның талдауымен Министрліктің 31 желтоқсанға дейін алма әкелуге тыйым салатын 2024 жылғы 5 қазандағы бұйрығы тек 8 қазанда күшіне енгені анықталды. Ал, алма тиелген 8 жүк көлігі аталған күнге дейін ЕАЭО аумағына келген. Яғни, кәсіпкерлердің бұл тауарларына шектеу шаралары қолданылмайды",- делінген хабарламада.

Көлік прокуратурасы Мемлекеттік кірістер комитетіне қадағалау актісін енгізді.

"Нәтижесінде, кәсіпкерлер уақытша сақтау мерзімі аяқталғанға дейін өз өнімдерін декларациялап, шығынның алдын алды".Бас көлік прокуратурасы

Бұған дейін Алматы қаласында кеңейтілген ауылшаруашылық жәрмеңкесі өткендігі хабарланған болатын.