Доминиканда түнгі клубтың шатыры құлап, 44 адам қаза тапты

Доминикан Республикасының Төтенше жағдайлар орталығының директоры Хуан Мануэль Мендес клубтағы шатырдың опырылып түсуінен қаза тапқандар саны 13-тен 44-ке дейін өскенін, тағы 146 адам түрлі жарақаттармен ауруханаға жатқызылғанын мәлімдеді, деп хабарлайды Zakon.kz.

Diario Libre агенттігі қирандылар астында әлі де адамдардың болуы мүмкін екенін жазды.

"Jet Set түнгі клубындағы шатырдың құлауынан қаза тапқандар саны 44 адамға жетті, ал 146 адам түрлі жарақаттармен Санто-Доминго ауруханалары мен емханаларына жеткізілді", – деді Мендес .

Оның айтуынша, іздеу жалғасуда, себебі үйінділердің астында әлі де тірі адамдар бар болуы мүмкін. Құтқару жұмыстарына жылу камералары мен акустикалық сенсорлық жабдықтар қолданылуда.