Ақтауда болған төбелес видеоға түсіп қалды

Ақтаудағы 20-шағын ауданда жаппай төбелес болып, оның видеосы Қазнетте тарап кетті, деп хабарлайды Zakon.kz.

Кадрларда оқиғаға қатысушылардың тек төбелесіп қана қоймай, көпшілік болып көлікті зақымдап, кейін оқиға орнынан жүріп бара жатқан көлікті қуалауға тырысқаны көрсетілген.

Облыстық полиция департаментінің баспасөз қызметі lada.kz сайтына оқиғаға қатысушылардың барлығының жеке басы қазірдің өзінде анықталғанын хабарлады. ҚР Қылмыстық кодексінің 293-бабы ("Бұзақылық") бойынша қылмыстық іс қозғалды. Қазір тергеу амалдары жүргізілуде.

Полицейлер түсіндіргендей, жанжал отбасылық келіспеушіліктен басталып, кейіннен жаппай төбелеске ұласқан.

Бұған дейін тағы бір оқиға хабарланған болатын. Жаңа жыл түні Алматыдағы кафелердің бірінде шетелдік студенттер жаппай төбелес шығарды.