Қазақстан үстел теннисінен әлем чемпионатын өткізуге өтінім берді

Халықаралық үстел теннис федерациясы (ITTF) 2027-2029 жылдар аралығындағы әлем чемпионаттарын өткізуге түскен барлық өтінімді жариялады, деп хабарлайды Zakon.kz.

2027 жылы әлем чемпионатын өткізуге ниет білдірген елдердің қатарына Қазақстан да кірді. Сондай-ақ, үміткерлер қатарында Бразилия, Қытай, АҚШ және Франция бар.

Өтінімдердің толық тізімі төмендегідей:

• 2027 жылғы әлем чемпионаты: Бразилия, Қытай, Франция, Қазақстан, АҚШ.
• 2028 жылғы командалық әлем чемпионаты: Қытай, Ирак, Италия, Жапония.
• 2029 жылғы әлем чемпионаты: Аустралия, Бразилия, Қытай, Германия, Ирак, АҚШ.

Соңғы шешім 2025 жығы 27 мамырда ITTF-тің жыл сайынғы жалпы жиналысында қабылданады. Онда Халықаралық федерацияның 227 мүшесі чемпионатты өткізу құқығы үшін үміткерлерге дауыс береді.