Жаз жалғасады: Қазақстанда күн +37°C-қа дейін ысиды

2026 жылғы 5-7 қыркүйекте Қазақстан аумағының басым бөлігі жоғары атмосфералық қысым өрісінің ықпалында болады. Елде негізінен жауын-шашынсыз әрі аз бұлтты ауа райы күтіледі, деп хабарлайды Zakon.kz "Қазгидромет" РМК-ға сілтеме жасап.

Синоптиктердің болжамынша, атмосфералық фронттардың әсерінен еліміздің батысында, оңтүстігі мен оңтүстік-шығысында кей жерлерде найзағай ойнап, өткінші жаңбыр жауады. Жекелеген аудандарда жел күшейеді.

"Еліміздің басым бөлігінде жаздағыдай жылы ауа райы сақталады", – делінген "Қазгидромет" хабарламасында.

Дегенмен шығыс өңірлерде және оңтүстік-шығыстың таулы аудандарында түнгі уақытта күн салқын болады.

Күндізгі ауа температурасы:

• батыста, солтүстікте және орталықта +25...+33°C;
• шығыста +20...+25°C;
• оңтүстікте +28...+37°C;
• оңтүстік-шығыста +20...+30°C;
• таулы және тау бөктеріндегі аудандарда +10...+20°C шамасында болады.

Қазақстан бойынша 4 қыркүйекке арналған ауа райы болжамын осы сілтемеден оқуға болады.