Жаңаөзен тұрғыны көлікті мас адамға бергені үшін 20 тәулікке қамалды

Жаңаөзенде көлік тізгінін ішімдік ішкен адамға берген әйел 20 тәулікке қамалды, деп хабарлайды Zakon.kz.

Жаңаөзен қалалық сотының баспасөз қызметі хабарлағандай, азаматша “Д.”-ға қатысты әкімшілік іс ҚР ӘҚБтК-нің 608-бабының 6-бөлігі бойынша, яғни көлікті алкогольдік мас күйдегі адамға басқаруға бергені үшін қаралды.

"2025 жылғы 22 қаңтарда Жаңаөзен қалалық сотының қаулысымен азаматша “Д.” ҚР ӘҚБтК-нің 608-бабының 1-бөлігіне сәйкес 7 жыл мерзімге көлік құралын басқару құқығынан айырылғанына қарамастан, ол көлікті жеңіл дәрежедегі мас күйдегі "К." есімді азаматқа басқаруға берген", - делінген соттың баспасөз хабарламасында.

Аталған құқықбұзушылық әйелдің түсініктемесімен қатар, әкімшілік құқықбұзушылық туралы электрондық хаттама және сот қаулысымен де расталған.

Тұрғын өз кінәсін мойындап, жасаған әрекетіне шын жүректен өкінетінін айтқан.

"Әкімшілік құқық бұзушылық туралы кодексінің 608-бабының 6-бөлігіне сәйкес, бұл құқықбұзушылық үшін 20 тәулікке әкімшілік қамау көзделген. Сот айыпталушының шын жүректен өкініш білдіруін жеңілдететін мән-жай ретінде қарады. Ал ауырлататын мән-жайлар анықталған жоқ. Сот қаулысымен "Д." кінәлі деп танылып, 20 тәулікке әкімшілік қамау түріндегі жаза тағайындалды", - делінген шешімде.

Сот қаулысы заңды күшіне енді.

Айта кетейік, бұған дейін жол қауіпсіздігі саласындағы құқықтық реттеулер Конституциялық Соттың құқықтық ұстанымдарына сәйкес қайта қаралғаны хабарланған болатын. Толығырақ ақпарат сайттағы материалда.