Жаңа жыл кеші: Алматыдағы кафелердің бірінде шетелдік студенттер жаппай төбелес ұйымдастырды

Алматыдағы кафелердің бірінде қаладағы жоғары оқу орындарының бірінің шетелдік студенттері арасында жанжал туындап, арты төбелеске ұласты, деп хабарлайды Zakon.kz.

Қақтығыс кезіндегі бейне желіде тарап кетті. Кадрлардан жастардың бірін-бірі еш аяусыз соққыға жығып жатқандығын көруге болады. Төбелес кезінде олар кафенің орындықтарын тіпті үстелдерін пайдаланған.

Алматы полиция департаменті оқиғаға қатысушылардың барлығы анықталып, Медеу ауданының полиция басқармасына жеткізілгенін хабарлады.

"Олардың әрқайсысының іс-әрекетіне құқықтық баға беріледі. Бұзақылық фактісі бойынша қылмыстық іс қозғалды. Басқа жағдайлар анықталуда", — деді ведомство.

Бұған дейін Петропавлда Жаңа жылда аяғын сындырып алып, есігін іштен аша алмаған екі әйелге көмек көрсетілгені хабарланған болатын.