«Үздік ғылыми қызметкер» сыйлығын беру тәртібі өзгерді

Ғылым және жоғары білім министрінің м. а. 2024 жылғы 27 желтоқсандағы бұйрығымен жыл сайынғы "Үздік ғылыми қызметкер" сыйлығын беру ережесін бекітті, деп хабарлайды Zakon.kz.

Сыйлық конкурстық негізде беріледі.

Ғылым саласындағы уәкілетті орган өзінің интернет-реcурсында "Үздік ғылыми қызметкер" жыл сайынғы конкурсының өтетіндігі туралы хабарландыру орналастырады.

Үміткерлер Конкурсқа қатысу үшін уәкілетті органның ақпараттық жүйесі арқылы келесі құжаттарды тапсырады:

• Сыйлықтарды алу конкурсына қатысу үшін осы Қағидаларға 1-қосымшаға сәйкес үлгідегі өтінім;
• Сыйлық беруге үміткердің ғылыми жетістіктерін бағалау көрсеткіштеріне сәйкес мәліметтер;
• ғылыми ұйымдардың және ЖЖОКБҰ консультативтік-кеңесші органының өтінішхаты (ұсынысы);
• жеке басын куәландыратын құжаты.

Конкурсқа құжаттар уәкілетті орган конкурс туралы хабарландыруды жариялаған күннен бастап күнтізбелік 20 (жиырма) күн ішінде ақпараттық жүйе арқылы қабылданады.

Құжаттары мемлекеттік құпияларды немесе "Қызмет бабында пайдалану үшін" және (немесе) "Құпия" деген белгісі бар таратылуы шектеулі қызметтік ақпараттарды қамтитын үміткерлер оларды мемлекеттік құпиялар туралы заңнамада белгіленген тәртіппен уәкілетті органға ұсынады.

Конкурстық құжаттарды қарау және сыйлықтарды тағайындау мәселесі бойынша шешімдер дайындау үшін уәкілетті органның бұйрығымен бекітілетін Комиссия құрылады.

Комиссияның төрағасы Комиссия мүшелерінің арасынан ашық дауыс беру арқылы оның мүшелерінің қарапайым көпшілік даусымен сайланады.

Сыйлық беруге үміткердің ғылыми жетістіктерін бағалау көрсеткіштері мынадай көрсеткіштерді қамтиды:

• Қазақстан Республикасында танылған ғылыми дәреженің болуы;
• уәкілетті органмен берілген ғылыми атағының болуы;
• таңдалған ғылыми бағыт бойынша ғылыми жобалар мен бағдарламаларға басшылық ету;
• таңдалған ғылыми бағыт бойынша ғылыми нәтижелердің болуы және сапасы (мақалалар және (немесе) шолулар, отандық және шетелдік журналдарда жарияланған монографиялар, оның ішінде монографиядағы тарау, патенттер, енгізулер және т.б.);
• таңдаулы ғылыми бағыт бойынша беделді халықаралық рецензияланатын журналдарда жетекші шетелдік ғалымдармен бірлескен авторлықпен мақалалардың болуы;
• соңғы жылы ЖЖОКБҰ-да кемінде бір пәнді немесе бірнеше пәндерді оқыту;
• философия докторы (PhD) немесе сала докторы ғылыми дәрежесін алған кадрларды дайындау;
• өндіріске енгізу үшін ғылыми және ғылыми-техникалық қызметтің расталған нәтижелері;
• ғылыми зерттеулердің сапасын, нәтижелілігін және әсерін арттыруға бағытталған қоғамдық жұмыс.

Секциялар жұмыстарды бағалайды және Комиссия айқындаған ғылыми жетістіктерді бағалау көрсеткіштеріне сәйкес әрбір үміткер бойынша қорытынды береді.

Нәтижелер Комиссия айқындаған үміткерлердің ғылыми жетістіктерін бағалау көрсеткіштерінің балдары бойынша сараланған тізімдер түрінде ғылым салалары бойынша ақпараттық жүйеде жеке ресімделеді. Нәтижелер әрбір қатысушы мүшенің қолымен расталған секция хаттамасымен бекітіледі және комиссияның қорытынды отырысына қарауға беріледі.

Комиссия секциялардың қорытындылары негізінде оларды алған күннен бастап 5 (бес) жұмыс күні ішінде уәкілетті органға Сыйлық беру жөніндегі шешімді енгізеді.

Комиссияның сыйлық беру туралы шешімі көпшілік дауыспен қабылданады. Комиссия мүшелерінің дауыстары тең болған жағдайда Комиссия төрағасының дауысы шешуші болып табылады.

Сыйлықтардың жалпы саны Комиссияның шешімі бойынша ғылымның әрбір бағыты бойынша келіп түскен өтінімдердің санына байланысты ғылыми бағыттар арасында бөлінеді.

Бұйрық 2025 жылғы 16 қаңтардан бастап қолданысқа енгізіледі.