Павлодарлық полицейлер ауыл тұрғынының үйіне тінту жүргізді: себебі белгілі болды

13:43, 14 сәуір 2025

© Фото: Zakon.kz

Павлодарлық полицейлер ауыл тұрғынының өз үйінде қарасора өсіргенін анықтады, деп хабарлайды Zakon.kz.

Таратылған ақпаратқа сүйенсек, Аққулы ауданының 46 жастағы тұрғыны заңсыз түрде жабайы қарасора өсіруді ұйымдастырған.

"Тұрғылықты жерін тінту барысында бөлмеде өсіру белгілері бар қарасора бұталары табылды. Ер адам қарасора өсіргенін, содан кейін алынған егіннен жеке пайдалануға арналған есірткі жасағанын түсіндірді",- делінген ақпаратта.

Сарапшылардың қорытындысына сәйкес, заңсыз айналымнан алынған каннабис тектес өсімдіктердің жалпы салмағы 3 келіден асты.

"Құрамында есірткі заттары бар өсімдіктерді заңсыз өсіру фактісі бойынша қылмыстық іс қозғалды. Қазіргі уақытта тергеу амалдары жүргізіліп жатыр",- деп мәлімдеді ведомство.