Алматыда заманауи қазақ романдарының авторлары марапатталды

Алматыда заманауи қазақ прозасын дамытуға және авторларды қолдауға бағытталған "Қазіргі заманғы қазақ романы" әдеби жобасының жеңімпаздарын салтанатты марапаттау рәсімі өтті, деп хабарлайды Zakon.kz.

Іс-шарада ҚР премьер-министрінің орынбасары – Мәдениет және ақпарат министрі Аида Балаеваның құттықтау хаты оқылды. Онда бұл жобаның ұлттық әдебиетті дамытуға елеулі үлес қосатыны, заманауи қоғамдық үдерістерді зерделеуге ықпал ететіні, сондай-ақ уақыт тынысын, қоғамның жай-күйін және адам тағдырын бейнелейтін жаңа романдардың жазылуына жол ашатыны атап өтілген.

Министрлік мәліметінше, байқауға 3 мыңнан астам өтінім келіп түсті. Іріктеу қорытындысы бойынша финалға сегіз автор шықты. Бас жүлдені "Кельндегі көкжал" романы үшін жазушы Жүсіпбек Қорғасбек иеленді. Байқау нәтижесі бойынша жеңімпаздың туындысы экранизацияланады.

Сондай-ақ жеті автордың шығармалары 1000 дана таралыммен жарық көріп, арнайы жүлдемен марапатталды. Атап айтқанда:

1. Думан Рамазан - "Сынақ",
2. Қуаныш Жиенбай - "Аралқұмдағы ақырғы аялдама",
3. Нұржан Қуантайұлы - "Опасыз ойын",
4. Асқар Алтай - "Каскад",
5. Мұрат Алмасбек - "Екі жағалау",
6. Қуат Бораш - "Тәубе",
7. Айым Ақылтай - "Қарыз".

Салтанатты рәсімде үздік шығармалардың таныстырылымы өтті.