Мәдиев Қазақстанның IT-нарығы жедел даму үстінде екенін айтты

Премьер-министрдің орынбасары – жасанды интеллект және цифрлық даму министрі Жаслан Мәдиев 2026 жылғы 10 ақпанда өткен Үкіметтің кеңейтілген отырысында Қазақстанның IT-нарығы қарқынды өсіп келе жатқанын және салаға таланттарды тарту бойынша қабылданып жатқан шаралар туралы мәлімдеді.

Министрдің айтуынша, еліміздің IT-нарығы жедел даму үстінде. Соңғы бес жылда IT-қызметтер экспорты 15 есеге артқан, ал IT-нарықтан түсетін табыс көлемі жылына 2 трлн теңгеге жеткен.

"Сонымен қатар IT саласы жоғары жалақы төленетін жұмыс орындарын қалыптастырып отыр: бұл саладағы жалақы деңгейі ел бойынша орташа көрсеткіштен шамамен екі есе жоғары. Astana Hub экожүйесі саланың дамуына негізгі катализаторға айналып, оны отандық және шетелдік IT-компаниялар үшін тартымды етті. Алайда біз мұнымен шектеліп қалмаймыз", – деді ол.

Сондай-ақ Мәдиевтің айтуынша, елге зерттеушілер, инженерлер және технологиялық кәсіпкерлер қажет.

"Осы мақсатта біз әлемнің түкпір-түкпірінен таланттарды іздеу және тарту бағдарламасын іске қосамыз. Мысалы, Telegram компаниясымен бірлесіп Қазақстанға ең мықты спорттық бағдарламашыларды тартатын боламыз. Өткен жылдың қорытындысы бойынша Astana Hub инфрақұрылымы еліміздің барлық өңірлерін қамтыды. Бұл жұмыс инфрақұрылымды ірілендіру және мазмұндық тұрғыдан толықтыру бағытында жалғасады. Сонымен қатар бүкіл Қазақстан бойынша таланттарды іздеу және стартаптарды өсіру жұмысы жүргізіледі. Бұл үдерісте alem.ai орталығы ерекше рөл атқарады", – деді спикер.

Бұған дейін президент тамақ өнеркәсібін дамытуға қатысты жүйелі шаралар қабылдау керектігін айтқан болатын.